आसन्न प्रतिनिधिसभा चुनावका लागि नेकपा एमालेले देशैभरी प्रत्यक्षतर्फ १६४ उम्मेदवार उठाउदा जम्मा १० जना मात्र महिला उम्मेदवार उठाएको छ । यद्यपी, आ–आफ्नो क्षेत्रमा प्रभाव जमाएका एमालेका १० महिला उम्मेदवार नै अन्य दलका उम्मेदवारका लागि भारी पर्ने देखिन्छ । एमालेले कोशीबाट ३, मधेशबाट ४, गण्डकीबाट २ र लुम्बिनीबाट १ गरी १० जना महिला उम्मेदवार उठाएको छ ।

यी १० क्षेत्र मध्ये गत चुनावमा सुनसरी ३, बारा ३ र धनुषा ३ मा तीनै जना महिला उम्मेदवार विजयी भएका थिए । ०७९ मा कास्की २ मा विद्या भट्टराईले पनि चुनाव जितेकी थिईन् तर यसपटक उनी उम्मेदवार छैनन् । आसन्न फाल्गुन २१ को चुनावमा एमालेले प्रत्यक्षतर्फ महिला उम्मेदवारको जीतको संख्या बढाउने दाउमा छ । त्यसैले, चुनावी रणनीति र घोषणापत्र बारे छलफल गर्न बुधबार प्रत्यक्षतर्फका १० जनै महिला उम्मेदवारलाई पार्टीले काठमाडौं ढाकेको छ ।

kalpana Rai, UML candidate, Solukhumbu

एउटा मात्रै निर्वाचन क्षेत्र रहेको कोशी प्रदेशको सोलुखुम्बुमा एमालेले यसपटक कल्पना राईलाई अघि सारेको छ । यस क्षेत्रमा नेपाली कांग्रेसबाट प्रकाश सिंह कार्की, नेपाली कम्युनिष्ट पार्टी (नेकपा)बाट अशिम राई उम्मेदवार छन् । ०७९ को चुनावमा यो क्षेत्रमा एमालेका मानवीर राईले निकटतम प्रतिद्धन्द्धी कांग्रेसका बलबहादुर केसीलाई हराउदै जित निकालेका थिए । सोलुखुम्बु जिल्ला कमिटीको सचिव रहेकी कल्पना ०७४ को स्थानीय तह निर्वाचनमा सोलुदूधकुण्ड नगरपालिकाको उपमेयर समेत भएकी थिइन् । सोलुका सात गाउँपालिका र एक नगरपालिका मध्ये ४ गाउँपालिका र एक नगरपालिकामा कांग्रेसकै बर्चस्व हुदा एमालेलाई जीत निकाल्न चुनौतीपूर्ण नै देखिन्छ ।

Ashmita Thapa, UML candidate, Okhaldhunga

एउटा मात्रै निर्वाचन क्षेत्र रहेको कोशीको ओखलढुंगामा पनि एमालेले अस्मिता थापालाई उम्मेदवार बनाएको छ । एमालेको पुष पहिलो साता सम्पन्न गरेको ११ औं महाधिवेशनमा उनी केन्द्रीय सदस्यमा विजयी भएकी थिईन् । लिखुँ गाउँपालिकाको उपाध्यक्ष पदबाट राजीनामा दिएर उनी संसदीय चुनावमा होमिएकी छन् । यस क्षेत्रमा ०७९ को चुनावमा कांग्रेसका रामहरी खतिवडाले एमालेका यज्ञराज सुनुवारलाई हराएर चुनाव जितेका थिए । कांग्रसभित्रको फेरिएको सत्ता नेतृत्वका कारण यसपटक रामहरीले टिकट पाएनन् । यस क्षेत्रमा कांग्रेसबाट कुमार लुँइटेल, नेकपाबाट अम्बिरबाबु गुरुङ, राष्ट्रिय स्वतन्त्र पार्टीबाट विश्वराज पोखरेल उम्मेदवार छन् । रामहरी नहुदा अस्मिता यस क्षेत्रमा जित निकाल्ने सुरमा छिन् । यद्यपी, रास्वपाको बढ्दो लहर साथै ओखलढुंगाका ७ गाउँपालिका र एक नगरपालिका मध्ये ३ गाउँपालिका र एक नगरपालिकामा कांग्रेस नै अग्रस्थानमा हुदा अस्मितालाई चुनाव जित्न त्यति सहज भने छैन ।

Bhagwati Chaudhary, UML candidate, Sunsari-3

कोशी प्रदेशबाटै सुनसरी–३ मा उम्मदेवार बनेकी भगवती चौधरी ०७९को प्रतिनिधिसभा निर्वाचनमा कांग्रसेका शक्तिशाली उम्मेदवार विजय गच्छदारलाई हराउदै सुनसरी–३ बाट निर्वाचित भएकी थिईन् । उनी महिलामन्त्री समेत भइसकेकी छन् । यो पटक पनि उनी तिनै गच्छादारसँग भिड्दै छिन् । चौधरी यसपटक पनि फेरि जित निकाल्ने सुरमा छिन् ।

यता, मधेशबाट बारा–३ मा एमालेबाट ज्वालाकुमारी साह उम्मेदवार बनेकी छन् । ०७९ को चुनावमा पनि साहले नै जित निकालेकी थिईन् । अघिल्लो पटक जनता समाजवादी पार्टीका निकटतम प्रतिस्पर्धी रामबाबु कुमार यादवलाई हराएकी साह यो पटक पनि तीनैसँग प्रतिस्पर्धा गर्दै छिन् । यस क्षेत्रमा कांग्रेसका फरमुल्लाह मन्सुर पनि साहका लागि चुनौती बनेका छन् । महोत्तरी–४ मा एमालेले निलम अधिकारीलाई उम्म्ेदवार बनाएको छ ।

स्थानीय राजनीतिमा काम गर्दै आएकी निलमसँग केन्द्रको संसदीय राजनीतिको अनुभव भने छैन । यस क्षेत्रमा अघिल्लो पटक एमालेले उम्मेदवार उठाएको थिएन । ०७९ को चुनावमा कांग्रसेका महेन्द्रकुमार राय विजयी भएका थिए । अहिले पनि उनी नै उम्मेदवार हुदा निलमलाई जित निकाल्न सहज छैन ।

Julikumari Mahato, UML candidate, Dhanusa-3

एमालेको तर्फबाट धनुषा–३ मा उम्मदेवार बनेकी जुलीकुमारी महतो यसपटक पनि जित निकाल्ने रणनीतिमा छिन् । ०७९ को चुनावमा पनि यस क्षेत्रबाट उनले नै जित निकालेकी थिईन् । अघिल्लो पटक तत्कालिन लोकतान्त्रिक समाजवादी पार्टी, नेपालका अनिल झालाई करिब १० हजार मतले हराउदै चुनाव जितेकी जुलीलाई यसपटक जित निकाल्न सहज छैन । यस क्षेत्रमा कांग्रेसका प्रभावशाली उम्मेदवार विमलेन्द्र निधि मैदानमा छन् । एमालेका उपमहासचिव रघुवीर महासेठकी श्रीमतीसमेत रहेकी महतो पूर्वमन्त्री समेत हुन् ।

एमालेबाट पर्सा–२ मा रिमाकुमारी यादव उम्मेदवार छिन् । एमाले–जसपा गठबन्धनका कारण ०७४ र ०७९ मा आफ्नो उम्मेदवार नउठाएको एमालेले यसपटक सामाजिक कार्यमा सक्रिय रिमालाई टिकट दिएको छ । यस क्षेत्रमा ०७९ मा कांग्रेसका अजय चौरासियाले चुनाव जितेका थिए भने यसपटक पनि चौरासिया नै उम्मेदवार बनेका छन् ।

गण्डकीबाट बागलुङ–२ मा मञ्जु शर्मा उम्मदेवार बनेकी छन् । उनी ०७९ को चुनावमा तत्कालिन माओवादीका नेता देवेन्द्र पौडेलसँग हारेकी थिईन् । यस क्षेत्रमा ०७४ र ०७९ दुबै चुनावमा देवेन्द्रले नै चुनाव जितेका छन् । यसपटक भने तत्कालिन माओवादी नेपाली कम्युनिष्ट पार्टी, नेकपामा गाभिएको छ । यस क्षेत्रमा नेकपाबाट ज्ञामनाथ गैरे, कांग्रेसबाट टेकराज पौडेल उम्मेदवार छन् । देवेन्द्र पौडेल उम्मेदवार नहुदा मञ्जु चुनाव जित्ने रणनीतिमा छिन् ।

Bhagwati Neupane, UML candidate, Tanahun- 1

यता, तनहुँ–१ मा एमालेले भगवती न्यौपानेलाई उम्मेदवार बनाएको छ । भगवती पूर्वमन्त्री साथै राष्ट्रिय सभा सदस्य समेत हुन् । राष्ट्रियसभा सदस्यबाट राजीनमा दिएर उनी प्रतिनिधिसभा निर्वाचनमा होमिएकी हुन् । यद्यपी, यस क्षेत्रमा उनी राष्ट्रिय स्वतन्त्र पार्टी, रास्वपाका स्वर्णीम वाग्ले, कांग्रेसका गोविन्द भट्टराई जस्ता प्रभावशाली उम्मदेवारहरुसँग भिड्दै छिन् । ०७९को चुनावमा कांग्रेसबाट राष्ट्रपति भएका रामचन्द्र पौडेलले जितेको क्षेत्र हो । ०८० को उपनिर्वाचनमा रास्वपाबाट स्वर्णीम वाग्लेले कांग्रेसका भट्टराईलाई हराएर जित निकालेका थिए । यसपटक पनि स्वर्णिम नै जित निकाल्ने सुरमा देखिन्छन् तर सहज भने देखिदैन ।

साथै, एमालेले लुम्बिनीबाट बर्दिया–२ मा विमला विकलाई उम्मेदवार बनाएको छ । यो क्षेत्रमा अघिल्लो चुनावमा स्वतन्त्र उम्मेदवार लालबीर चौधरीले चुनाव जितेका थिए भने तत्कालिन माओवादीका सुरेश पन्थ दोस्रो र एमालेका पंकजसिंह राठौर तेस्रो भएका थिए । यसपटक नेकपाबाट तीनै सुरेश पन्थ उम्मेदवार बनेका छन् भने कांग्रेसबाट किशोरसिंह राठोर चुनावी मैदानमा छन् । एमलेले उठाएको १० महिला उम्मेदवार मध्ये कोही संसदीय राजनीतिको यात्रामा परिक्षित भइसकेका छन् भने केही नयाँ अनुहार छन् ।