हेलिकप्टर चढेर जेलबाट नै कुख्यात गुन्डा नाइके फरार, खोजीका लागि तीन हजार प्रहरी परिचालित

कुख्यात फ्रान्सेली गुन्डा नाइके रिदुअन फइद, जो फ्रान्सको पेरिस स्थित जेलबाट नै हेलिकप्टर चढेर फरार भएका छन् । चौतर्फी सुरक्षा घेराका बाबजुत पनि उनि जेलमानै हेलिकप्ट मगाएर सुरक्षा घेरा तोड्दै भागेका हुन् ।

कसरि भागे त कुख्यात गुन्डा नाइके रिदुअन ?
रिदुअन, जेलको आगन्तुक कक्षमा आफ्ना भाई सँग कुराकानी गरेर बसिरहेका थिए । त्यही समयमा उनलाई जेलबाट भगाउन अत्याधुनिक राइफलसहित तीन जना हेलिकप्टर लिएर आए र जेल परिसरमै रोकिए । तीन जना मध्य १ जना बन्दुकधारी हेलिकप्टरको सुरक्षा गर्दै त्यहीं बसे । दुईजना बन्दुकधारी ओर्लिए र धूँवा फाल्ने बम र फलाम काट्ने हतियारको प्रयोग गरी रिदुअनलाई जेलबाट निकाले र सबैजना हेलिकप्टर चढेर फरार भए । उनिहरुले त्यहाँबाट हेलिकप्टर नजिकैको गोनिसी क्षेत्रमा पुर्‍याए र आफूहरु ओर्लिर भागे । घटनाको केही बेरमा प्रहरीले हेलिकप्टर भने फेला पारेको थियो ।

हेलिकप्टरका लिएर आएका पाइलट व्यावसायिक उडान तालिम दिने व्यक्ति हुन् र उनलाई ती बन्दुकधारीहरूले बन्धक बनाएर ल्याएका थिए । बन्धक बनाइएका पाइलटलाई पछि रिहा गरिएको थियो र आघातबाट पीडित पाइएकाले अस्पताल लगिएको थियो । हेलिकप्टरबाट ओर्लिएपछि रिदुअन एउटा कारमा चढेर ए वान मोटरवेतर्फ अघि बढेको थियो । अहिले उनको खोजीका लागि तीन हजार फ्रान्सेली प्रहरी परिचालित गरिएको प्रहरी स्रोतलाई उद्धृत गर्दै एफएफपी समाचार संस्थाले जनाएको छ । ती भगौडा बन्दीलाई पक्रन हरसम्भव उपाय भइरहेको फ्रान्सको आन्तरिक मामिला मन्त्रालयले जनाएको छ । हेलिकप्टर अवतरण गराइएको जेलभित्रको परिसर हेलिकप्टरलाई पासो थाप्न नसकिने उक्त जेलको एकमात्रै परिसर रहेको थियो । आइतवार अपरान्ह भएको उक्त घटनामा कोही पनि घाइते नभएको बताइएको छ । ४६ वर्षीय रिदुअन फइदलाई डकैती मुद्दामा २५ वर्ष जेल सजाय तोकिएको थियो ।

को हुन् कुख्यात गुन्डा नाइके रिदुअन फइद ?
सन् १९७२ मा जन्मिएका रिदुअन पेरिस क्षेत्रमै हुर्किएका थिए । सन् १९९० को दशकमा फ्रान्सको राजधानीमा रिदुअनले सशस्त्र डकैती र फिरौती असुल गर्ने एउटा समूह सञ्चालन गरेका थिए । रिदुअनले आफ्नो जीवनशैली गुण्डा नाइके पात्र भएका हलिवूड सिनेमाबाट प्रेरित भएको बताउने गर्थे । अमेरिकी निर्माता माइकल म्यानका अपराध सम्बन्धी सनसनीपूर्ण चलचित्रबाट आफू प्रेरित भएको रिदअनले बताउँथे । बैंक डकैतीको सीप सिक्न दर्जनौं पटक चलचित्रहरू हेरेको उनले दाबी गरेका थिए ।

सन् १९९८ मा बैंक डकैती र चोरीका एउटा भन्दा बढी अभियोगमा पक्राउ परेपछि फइद थुनामा पर्ने र जेलबाट भाग्ने क्रम निरन्तर चलिरहेको छ । जेल तोडेर उनी भागेको यो दोस्रो घटना हो । सन् २०१३ मा उनले चारजना गार्डलाई कब्जामा लिएर कैयौं ढोकाहरू डाइनामाइट विस्फोट गराउँदै भागेका थिए । त्यसबेला उत्तरी फ्रान्सको जेलमा पुर्‍याइएको आधा घण्टामै उनी भाग्न सफल गएका थिए र ६ हप्तासम्म फरार रहेका थिए । त्यसो त फ्रान्सको जेलबाट हेलिकप्टरमा भाग्ने उनी पहिलो बन्दी होइनन् । सन् २००१ मा तीनजना सशस्त्र डाँकाहरू दक्षिणी फ्रान्सको एउटा जेलबाट भागेका थिए । यस्तै प्रवृत्तिबाट अन्तर्राष्ट्रिय लागू औषध तस्करीको सञ्जाल चलाउने आरोप खेपिरहेका बन्दीहरू पनि त्यसको दुई वर्षपछि भागेका थिए । एजेन्सी