सचिवालय बैठक बीचमै छोडेर हिँडे प्रधानमन्त्री ओली

काठमाडौं- सत्तारुढ दल नेकपाको सचिवालय बैठक बीचमै छोडेर प्रधानमन्त्रीसमेत रहेका अध्यक्ष केपी ओली बाहिरिएका छन् ।

बैठकमा नेताहरुबीच विवाद भएसँगै ओली बैठक छोडेर हिँडेका स्रोतको दाबी छ ।

बालुवाटार स्रोतका अनुसार सचिवालय बैठक चलिरहेको बेलामा विवाद भएपछि प्रधानमन्त्री ओली बैठक छोडेर हिँडेका थिए । उनी हिँडेपनि बैठक भने जारी रहेको छ ।

अध्यक्ष ओली र अर्का अध्यक्ष पुष्पकमल दाहाल प्रचण्डबीचमा विवाद भएको स्रोतको दाबी छ ।

‘बैठक शुरु भएको केही समयमा नै अध्यक्ष ओली हिँड्नु भयो’, स्रोतले भन्यो, स्थायी समिति बैठकका एजेण्डका विषयले दुई अध्यक्षबीच विवाद भएको थियो ।’

बुधवार अपराह्न बालुवाटारस्थित प्रधानमन्त्री निवासमा सचिवालय बैठक शुरु भएको थियो ।

विहीबार(भोलि) का लागि बोलाइएको स्थायी समिति बैठकमा पेस गर्ने प्रस्तावका बारेमा छलफल गर्न बैठक बोलाइएको थिया ।
नेकपामा केही समय यता विवाद देखिएको छ ।

पार्टी अध्यक्षसमेत रहेका प्रधानमन्त्री केपी शर्मा ओली नेतृत्वको सरकारले दुई विवादास्पद अध्ययादेश जारी गर्ने निर्णय गरेसँगै नेकपाको विवाद चुलिएको थियो ।

पार्टी फुटाउने गरि अध्ययादेश ल्याउन खोजेको भन्दै विरोध भएको थियो । अर्का अध्यक्ष प्रचण्ड, नेता माधव नेपाल, उपाध्यक्ष वामदेव गौतम लगायतले प्रधानमन्त्री ओलीलाई सरकारबाट बाहिरिन दबाब दिइरहँदा ओलीले उपाध्यक्ष गौतमलाई आगामी प्रधानमन्त्री र नेता नेपाललाई तेस्रो अध्यक्ष बनाउन प्रस्ताव गरेका थिए ।

गत शनिवार बसेको बैठकमा उपाध्यक्ष गौतमलाई उपयुक्त समयमा प्रतिनिधिसभामा लैजाने, प्रधानमन्त्री ओलीसहितका नेताले यसअघिका गल्तीमा आत्मआलोचना गर्ने र पार्टी एकतालाई थप मजवुद बनाएर अघि बढ्ने प्रतिवद्धता व्यक्त गरेका थिए । त्यस्तै २५ गतेका लागि स्थायी समिति बैठक बोलाइएको थियो ।

ओलीले स्थायी समिति बैठकलाई टार्ने प्रयास गरेपनि अधिकांश सचिवालय सदस्य स्थायी समिति बैठकको पक्षमा रहेका थिए ।
गत हप्ताको वैठकपछि नेकपाको विवाद केही मत्थर भएको अनुमान गरिएको थियो ।